ភ្នំពេញ៖ សង្គមហ្វេសប៊ុក ឆាតតាមអនឡាញ វាគឺជាបណ្តាញសង្គមយក្សមួយ កំពុងពេញនិយម សម្រាប់ប្រជាពលរដ្ឋ នៅលើសកលលោក ទាំងប្រជាពលរដ្ឋនៅកម្ពុជា ចង់ដឹងព័ត៌មានផ្សេងៗ និងចង់បានការប្រាស្រ័យទាក់ទងគ្នា ការចងសម្ព័ន្ធមិត្ត មានអ្នកខ្លះក៏ជួបមិត្តល្អ អ្នកខ្លះក៏ជួបមិត្តទុរយស បោកបញ្ឆោត បង្កឲ្យមានការខាតបង់ទ្រព្យសម្បតិ្ត អស់ខ្លួនប្រាណ ធ្វើឲ្យអាស្រូវកេរ្តិ៍ រហូតដល់បាត់បង់ជីវិតក៏មាន យ៉ាងណាមិញ ដូចជានារីម្នាក់ បានចាញ់បោកមិត្តភកិ្តស្រីរបស់ខ្លួន ដោយអំពើទុច្ចរិត គឺមិត្តស្រីបានប្រើល្បិច ឲ្យប្រុសស្នេហ៍របស់ខ្លួន ឆាតតាមហ្វ័តអាប់ លួងលោមសុំស្នេហា រហូតដល់នារីរងគ្រោះ បាក់ចិត្តប្រតិព័ទ្ធ ធ្លាក់ចូលយ៉ាងជ្រៅទៅក្នុងអន្លង់ស្នេហ៍ ដោយងើបមុខមិនរួច រហូតដល់បុរសរូបនោះ បានល្បួងនារីរងគ្រោះ ទៅសណ្ឋាគារ ដោយសន្យាថា នឹងឲ្យប្រាក់ ១០០ដុល្លារ ដើម្បីក្រេបទឹកឃ្មុំដ៏ផ្អែមត្រជាក់នេះ ប៉ុន្តែពេលនារីរងគ្រោះទៅដល់សណ្ឋាគារ ជនសង្ស័យជាមិត្តភក្តិស្រីនិងប្រុសស្នេហ៍ ព្រមទាំងបក្ខពួក ៤ទៅ៥នាក់ នៅរង់ចាំស្រាប់ បានចាប់នារីរងគ្រោះចងដៃ ចងជើង ដោះយកគ្រឿងអលង្ការ និងប្រាក់កាសមួយចំនួន និងទូរស័ព្ទដៃ។ ដោយបាត់ជនរងគ្រោះមួយយប់ ក្រុមគ្រួសារបានដាក់ពាក្យប្តឹងទៅសមត្ថកិច្ច រកឃើញជនរងគ្រោះ ស្ថិតនៅក្នុងសណ្ឋាគារស ផ្លូវព្រះមុនីវង្ស សង្កាត់អូរឫស្សីទី៤ ខណ្ឌ៧មករា  ចាប់ខ្លួនជនសង្ស័យបាន កាលពីរសៀលថ្ងៃទី១៨ ខែកក្កដា ឆ្នាំ២០១៦។

សមត្ថកិច្ចបានឲ្យដឹងថា មុនពេលកើតហេតុ នារីរងគ្រោះមានមិត្តភក្តិស្រីៗដូចគ្នា ក្រោយមក ក៏បានបង្កើតហ្វ័សអាប់ឲ្យជនរងគ្រោះប្រើ និងឲ្យដៃគូរបស់ខ្លួនជាមិត្តប្រុសឆាត ឆ្លងឆ្លើយស្នេហា លួងលោមក្នុងគំនិតទុច្ចរិត បោកប្រាស់រហូតដល់ស៊ីជម្រៅ រហូតឈានដល់ណាត់គ្នា មកជួបក្រេបទឹកឃ្មុំនៅសណ្ឋាគារស ស្ថិតនៅតាមបណ្តោយផ្លូវព្រះមុនីវង្ស សង្កាត់អូរឫស្សី៤ ខណ្ឌ៧មករា ដោយសន្យាថា នឹងឲ្យប្រាក់ចំនួន១០០ដុល្លារ ។ នារីរងគ្រោះហេតុតែចង់បានលុយផង និងមិនដឹងពីគំនិតទុច្ចរិតមិត្តស្រី របស់ខ្លួនផងនោះ ក៏សម្រេចចិត្តមកតាមការណាត់ នៅសណ្ឋាគារស ក្នុងបន្ទប់មួយ ។ សមត្ថកិច្ចបន្តថា ពេលនារីរងគ្រោះមកដល់ សណ្ឋាគារ ស្រាប់តែ លេចចេញក្រុមជនសង្ស័យទាំងស្រី ទាំងប្រុស ពី៤ទៅ៥នាក់ បានចាប់នារីរងគ្រោះបិទមាត់ និងចងដៃ ចងជើង ប្រមូលយកទូរស័ព្ទ គ្រឿងអលង្ការ និងប្រាក់មួយចំនួន ហើយដាក់ក្នុងបន្ទប់ផ្សេង ។ ដោយឡែកពួកគេ ក៏សម្ងំនៅឯបន្ទប់ផ្សេង ចំនួន ២បន្ទប់ ដែលជាទីតាំងរបស់ពួកគេ ស្នាក់អាស្រ័យធ្វើសកម្មភាពល្មើស។

បន្ទាប់ពីបាត់នារីរងគ្រោះមួយយប់ ធ្វើឲ្យក្រុមគ្រួសាររបស់នាង ភ័យស្លន់ស្លោដើររក  មិនដឹងនាងទៅណា ក្រុមគ្រួសារក៏បានសួរ អ្នកដែលឌុបមក ដឹងថា មកកាន់សណ្ឋាគារស ក៏ប្តឹងសមត្ថកិច្ច ឲ្យអន្តរាគមន៍រកជនរងគ្រោះ ។ ក្រោយមក ក៏បានឃើញជនរងគ្រោះ នៅក្នុងបន្ទប់ សណ្ឋាគារនេះ ហើយជាប់ចំណងពិតមែន ។ ក្រោយពី ជួយនារីរងគ្រោះបានហើយ សមត្ថកិច្ចក៏បានឃាត់ខ្លួនជនសង្ស័យ ជាមិត្តភកិ្តស្រី និងប្រុសស្នេហ៍របស់គេនោះ យកមកសាកសួរតែម្តង៕